Американските научници можеби откриле зошто некои луѓе добиваат главоболка и по консумирање на мала количина црвено вино, иако не наидуваат на сличен проблем при конзумирање други видови алкохол.
Тимот од Универзитетот во Калифорнија вели дека причината за тоа е соединение присутно во црното грозје кое може да влијае на разградувањето на алкохолот во организмот. Тоа е антиоксиданс или флаванол, соединение познато како кверцетин кое се наоѓа во кората на грозјето.
– Ако грозјето се одгледува во област со повеќе сонце, тогаш се произведува повеќе кверцетин. Тоа значи дека за луѓето кои се повеќе склони кон главоболки, поголем проблем би можело да претставува консумацијата на поскапи, а не поевтини црвени вина – вели еден од истражувачите, професорот Ендрју Вотерхаус.
– Евтините сорти на грозје се одгледуваат на крупни винови лози со повеќе листови и не се сонце премногу, додека висококвалитетното грозје доаѓа од винова лоза со помалку лисја и поголема изложеност на сончевите ултравиолетови зраци. Големо внимание се посветува на количината на сонце што ја добива грозјето за да се подобри квалитетот на виното – објасни тој.
Можен виновник
Постојат неколку претпоставки за тоа зошто главоболката може да се појави кај поединци половина час по консумирањето дури и мала количина црвено вино.
Некои сметаат дека причината се сулфитите – конзерванси кои се користат за продолжување на рокот на траење и одржување на свежината на виното, но обично концентрацијата на сулфити е поголема кај послатките вина во споредба со црвените вина.
Иако некои луѓе се алергични на сулфити и знаат да ги избегнуваат, има малку докази дека тие предизвикуваат главоболки. Друг можен виновник е хистаминот, кој почесто се наоѓа во црвените отколку во белите или розе вината.
Хистаминот може да предизвика проширување на крвните садови во телото, што може да предизвика главоболка. Но, ниту за тоа нема сигурни докази.
Распаѓање
Разградувањето на алкохолот во организмот се одвива во два чекори – алкохолот се претвора во токсично соединение ацеталдехид, кое потоа се претвора во безопасен оцет со помош на ензимот за метаболизирање на алкохолот (ALDH2). Ако тоа не се случи, штетен ацеталдехид се акумулира и предизвикува симптоми.
– Кога кверцетинот ќе влезе во крвотокот, телото го претвора во различна форма наречена кверцетин глукуронид – вели професорот. Бидејќи кверцетинот глукуронид се меша со ензимот кој помага во разградувањето на алкохолот, може да предизвика акумулација на хемикалија наречена ацеталдехид, што пак може да резултира со гадење и главоболки, пренесува Би-Би-Си.
