Во експлозија во магацин на пиротехнички средства во Тајланд, девет лица загинаа, а повеќе од 100 се повредени, соопшти локалната полиција. Експлозијата, која се случи во градот Сунгаи Колок во провинцијата Наративат, се верува дека била предизвикана од заварување за време на градежните работи на зградата.
Снимките објавени од локалните медиуми покажуваат огромен облак од чад кој се издигнува во воздухот и бројни продавници, домови и возила се тешко оштетени од силината на експлозијата, некои во пламен, а некои со разнесени покриви. Тајландската телевизија PBS објави дека се уништени дури 500 куќи.
„Дома си играв на телефон, а потоа наеднаш слушнав силен громогласен шум и целата куќа ми се затресе“, вели Сексан Таесен, која живее на 100 метри од магацинот. „Тогаш видов дека ми се урнал покривот. Погледнав надвор и видов како се урива куќата и насекаде луѓе лежат на земја. Беше хаос“.
Видеото снимено од Сексан прикажува сцена на хаос на локалниот пазар, со повредени локални жители кои талкаат наоколу додека службите за итни случаи брзаат да помогнат. Искршено стакло, плочки и други отпадоци беа расфрлани на земја.
Тајланд има слабо безбедносно досие во градежниот сектор и фаталните несреќи се чести. Минатиот месец две лица загинаа кога патен мост во изградба во Бангкок се урна во сообраќајот.
