Украински генерал потврди денеска за Си-Ен-Ен дека Украина ја добила контроверзната касетна муниција од САД.
„Само што ја добивме. Сè уште не сме ја користеле, но може радикално да ја промени ситуацијата на бојното поле“, рече генералот Олександар Тарнавски.
„И непријателот знае дека ќе имаме предност со ова оружје. Тие ќе ни го остават делот од теренот каде што е можно да го користиме. Ова е многу моќно оружје, повисоките власти ќе одлучат каде ќе го користиме ,” тој додаде.
Тарнавски нагласи дека нема да се користи касетна муниција во густо населените области, дури и ако тие се окупирани од руските сили.
САД објавија дека добиле писмена гаранција дека Украина нема да го користи ова оружје во населени места и дека операциите за деминирање ќе бидат извршени по завршувањето на војната.
„Русите мислат дека ќе го користиме во сите области на линијата на фронтот. Тоа во никој случај не е точно. Но, тие се многу загрижени“, рече генералот.
САД соопштија дека испратиле касетна муниција во Украина поради малата понуда на стандардни артилериски ракети.
„Снабдувањето со касетна муниција е привремено. Штом производството на ракети ќе достигне ниво што може да ги задоволи потребите на Украина, тогаш нема да има потреба да се испраќа дополнително касетно оружје“, рече во вторникот Џејк Саливан, советник за национална безбедност на САД.
