Унгарија ја блокира воената помош вредна половина милијарда евра во седмиот таков пакет во рамките на Европскиот мировен фонд, изјави за полски РМФ висок дипломатски извор од ЕУ.
Земјите членки на ЕУ ќе се обидат да ја убедат Будимпешта да го промени ставот в понеделник за време на состанокот на министрите за надворешни работи.
Претходно, Унгарија само се воздржа од гласањето за поддршка на Европскиот мировен фонд за Украина, но не го блокира.
Меѓутоа, во декември Унгарија блокира 18 милијарди евра макрофинансиска помош за Украина. ЕУ на крајот најде начин да ги испрати парите. Сличен резервен план наводно сега е на маса.
„Тешко е за една мала, проруска држава, која има исклучоци од сите санкции, да ја диктира позицијата на целата ЕУ“, рече дипломат на ЕУ за РМФ.
Унгарија предизвика дополнителен гнев кај земјите од Европската Унија бидејќи сака да отстрани неколку руски олигарси од црната листа на санкции на ЕУ, без никакво објаснување.
„Тоа е исто како да барате амнестија за некој што е осуден бидејќи тие што се на црната листа се на неа бидејќи има докази за тоа“, вели дипломат од ЕУ.
Помошта на ЕУ и нејзините земји членки за Украина од почетокот на руската инвазија изнесува вкупно 50 милијарди евра, се наведува во извештајот на Европскиот совет.
