Посредувањето во воспоставувањето безбедна зона околу нуклеарната централа „Запорожје“ во Украина станува сè потешко поради мешањето на војската во преговорите, изјави денеска шефот на агенцијата за нуклеарен мониторинг на ОН.
Во март руските сили ја зазедоа најголемата нуклеарна централа во Европа, „Запорожје“.
Не верувам дека е невозможно, но не се лесни преговорите, изјави главниот директор на Меѓународната агенција за атомска енергија (МААЕ), Рафаел Гроси, во интервју за италијанската јавна телевизија РАИ.
Гроси, кој претходно изјави дека се надева оти ќе постигне договор за заштита на централата пред крајот на 2022 година, рече дека преговорите со Киев и Москва станале покомплицирани бидејќи во нив се вклучени не само дипломати туку и воени офицери.
„Преговарачката маса стана подолга и потешка“, рече Гроси.
Шефот на МААЕ рече дека планира да се врати во Украина следната недела за да се сретне со претседателот Володимир Зеленски и други високи украински претставници и се надева дека подоцна ќе отпатува за Москва.
Рускиот претседател Владимир Путин во моментот не планира да се сретне со Гроси, изјави портпаролот на Кремљ, Дмитриј Песков, пренесува „Интерфакс“.
Москва и Киев меѓусебно се обвинуваат за гранатирање на нуклеарната централа „Запорожје“.
„Си играат со оган. Нуклеарна несреќа никому не му е во интерес, дури ни на Русите“, изјави Гроси.
