Претседателот на Турција, Реџеп Таип Ердоган во видео порака објавена по повод Новата година истакна дека се надева оти оваа земја ќе продолжи да бележи напредок и бројни чекори и во иднина.
Тој во оваа смисла посочи дека никој не може да го негира фактот дека Турција со својот разумен и умерен однос во меѓународните кризи ја освои сечија почит.
– Додека светот се бори со енергетската криза, благодарение на нашата позиција станавме центар на меѓународните канали за набавки и трговија. Се надеваме дека во 2023 година, благодарение на нашата визија за векот на Турција, ќе започнеме многу поголем чекор што му доликува на новиот век на нашата Република – рече Ердоган.
Во 2023 година Турција ја слави стогодишнината од основањето на Републиката.
Ердоган исто така посочи дека целта на Турција не е само да влезе во највисокиот ранг на глобалната политичка и економска група на земји, туку да постигне политичка и економска моќ на највисоко ниво.
– Демократијата и развојната инфраструктура што ги постигнавме во нашата земја во последните 20 години ја гледаме како основа и почеток на овој голем напредок. Нашата цел е да го започнеме овој процес на најдобар и најефикасен начин и да им оставиме на нашите млади луѓе земја во која ќе можат да продолжат да ја водат новото турско доба кон успех во согласност со нашите цели, соништа и цивилизациско и историско наследство. Со овие чувства се збогуваме со 2022 година и сакам 2023 година да биде исполнета со мир, спокојство и благосостојба“, рече турскиот претседател.