НАТО се подготвува да достави опрема против дронови во Украина, изјави денеска генералниот секретар на НАТО, Јенс Столтенберг, по состанокот на министрите за одбрана на алијансата во Брисел.
Столтенберг ова го изјави кога Украина побара од своите сојузници повеќе системи за противвоздушна одбрана и муниција поради честата руска употреба на т.н. дронови „камикази“.
„Сојузниците на НАТО ќе испратат напредни системи, вклучувајќи артилерија, противвоздушна одбрана и оклопни возила. Им благодарам на сите сојузници и ги повикувам да ги зголемат напорите да ѝ помогнат на Украина. Покрај тоа, испраќаме гориво, зимска облека и медицински материјали во Украина.
Како дел од истиот пакет-помош, НАТО набргу ќе испорача опрема против дронови на Украина. Тоа се стотици електронски уреди за заглавување беспилотни летала, кои може да им помогнат на Украинците да се борат против дронови од Русија и Иран и да ги заштитат украинскиот народ и критичната инфраструктура“, рече Столтенберг.
НАТО, рече генералниот секретар, „исто така ќе ѝ помогне на Украина да премине од воена опрема од советската ера на модерна опрема на НАТО“, рече Столтенберг.
На прес-конференцијата во Брисел присуствуваше и украинскиот министер за одбрана, Олексеј Резников, кој информира за ситуацијата на линијата на фронтот: „Украина добро напредува и ги потиснува окупаторските руски сили на исток и на југ“, рече Резников.
