Москва ја смета потенцијалната посета на претседателката на Претставничкиот дом на САД, Ненси Пелоси на Тајван за „чисто провокативен чин“ што придонесува за и онака високите тензии во регионот, изјави портпаролот на Кремљ, Дмитриј Песков, на прес-конференција.
Песков рече дека иако „не можеме со сигурност да кажеме“ дали Пелоси ќе слета во Тајван или не, нејзината турнеја низ регионот и можна посета на Тајпеј „ја провоцира ситуацијата“ и „води до тензии“.
– Тоа го гледаме, сите земји во светот го бележат. Тука сме апсолутно солидарни со Кина. Нејзината чувствителност по ова прашање е разбирлива. Тоа е оправдано. И наместо да го почитуваат ова, САД го избираат патот на конфронтација. Тоа не навестува добро – рече портпаролот на Кремљ, додавајќи дека одлуката на Вашингтон е „само за жалење“.
Песков, исто така, истакна дека во случај да избие воен конфликт како резултат на тековните тензии меѓу Кина и САД околу Тајван, границите на Русија ќе бидат обезбедени од руската војска.
– Без оглед на појавата на некои провокативни ситуации, безбедноста на нашите граници по целиот периметар на овие граници ја обезбедуваат вооружените сили на Руската Федерација – рече Песков.
Говорејќи за можната посета на Ненси Пелоси, портпаролот на кинеското Министерство за надворешни работи, Жао Лиџијан, предупреди дека „ако си играте со оган, ќе изгорите“.
– Верувам дека САД се целосно свесни за силните и јасна порака од Кина, остар беше Песков.
Ако Пелоси „се осмели“ да отпатува во Тајван, Кина нема да седи со скрстени раце и ќе преземе „решителни и силни контрамерки“ за заштита на суверенитетот и територијалниот интегритет на Кина, рече Лиџијан.
Тајван, се самоуправува од 1949 година, но никогаш официјално не прогласил независност од Пекинг.