Украинскиот Генералштаб соопшти дека во војната во Украина загинале околу 18.900 руски војници, пренесува Анадолија.
Генералштабот објави податоци за загубите на руската армија од 24 февруари до 7 април. Се наведува дека загинале 18.900 руски војници, како и дека се уништени 150 авиони, 135 хеликоптери и 698 тенкови.
Соопштено е и дека се уништени 1.891 оклопно возило, 108 ракетни системи, седум бродови, 111 беспилотни летала и 55 системи за противвоздушна одбрана кои им припаѓале на Русите.
Војната меѓу Русија и Украина, која започна со рускиот напад на 24 февруари, предизвика меѓународна осуда, доведе до финансиски санкции против Москва и го поттикна егзодусот на светските компании од Русија.
Податоците на Обединетите нации покажуваат дека за време на руско-украинската војна во Украина загинале најмалку 1.563 цивили, а 2.213 биле ранети. Повеќе од 4,27 милиони цивили побегнале во соседните земји.