Секторот за борба против тероризам, насилен екстремизам и радикализам до Основното јавно обвинителство поднесе кривична пријава против С.И. (30) од Скопје, за учество во странска војска.
Во август 2015 година, С.И., заедно уште со 34 други лица се кривично пријавени за учество во странска војска, за што е осуден на 10-годишна затворска казна и во моментов се наоѓа на издржување на затворската казна во Идризово.
Со цел обезбедување докази за сторени нови кривични дела од С.И., од страна на ОЈО за ГОКК до надлежните органи во Р Косово е побарана меѓународна правна помош, при што од страна на Специјалното обвинителство на Р Косово е доставен одговор со соодветни докази. Од доказите е утврдено дека на 25.7.2015 на социјална мрежа е објавена фотографија со испишан текст на албански јазик, со кој С.И. повикувал, врбувал и поттикнувал лица да се приклучат на Исламска држава и да војуваат за неа.
Пронајдени се и други објави во врска со кривичното дело.
