Италијанската полиција протестираше до МВР поради набавката на розови заштитни маски, кои полицајците треба да ги носат на должност, тврдејќи дека бојата го нарушува нивниот углед.
„Не ја разбираме причината за набавката на маски во боја, кои на прв поглед би биле несоодветни за нашата администрација“, се вели во писмото на полицискиот синдикат до Министерството за внатрешни работи.
Полициските службеници оценуваат дека „оваа набавка е збунувачка“ и дека со оглед на тоа што здравствената криза трае две години, би требало лесно да се набават соодветни заштитни маски.
Во иднина маските да бидат само црни, бели или сини, бараат полицајците во писмото.
Од италијанското МВР не се огласија во оваа пригода.
