Над 11.000 луѓе се евакуирани поради поплавите во бразилската држава Баија, а властите се обидуваат да им пружат помош на жителите кои немаат алтернативно сместување.
Во обилните дождови кои паѓаат од ноември загинаа 17 лица, а последната жртва е пријавена во четвртокот, соопшти државната агенција за цивилна заштита.
Дождовите особено тешко погодија 19 населени места, вклучувајќи ги Гуаринга, Итороро и Коарачи на југ, а според државната агенција за цивилна заштита, 11.260 луѓе биле принудени да ги напуштат своите домови.
Владата на сојузната држава Баија и надлежните федерални институции вчера започнаа заедничка операција, во соработка со други бразилски држави, со цел распоредување луѓе, спасувачки авиони и опрема по потреба, како и давање помош на жителите во загрозените подрачја.
„ Целосно сме мобилизирани, ги преземаме сите мерки за да им ја пружиме неопходната поддршка на жртвите од обилните дождови што ја зафатија Баија овој Божиќ“, рече гувернерот на таа држава, Руи Коста.
