Првата пратка со вакцини од „Астра зенека“ преку Ковакс механизмот пристигна утринава на Меѓународниот аеродром Скопје.
Министерот за здравство, Венко Филипче, најави дека се стигнати 24.000 вакцини „Астра зенека“ и дека со нив ќе бидат вакцинирани лицата над 75 години.
„Првите граѓани кои ќе бидат имунизирани со оваа пратка вакцини, се хронично болните и лица над 75-годишна возраст, како ризична група. Масовната вакцинација ќе започне во среда во здравствените домови. Во текот на април се очекува да стигнат преостанатите 76 илјади ‘Астра зенека’ преку Ковакс механизмот. Сега сме посветени системот на имунизација да почне брзо и ефикасно. Имаме најави и за други вакцини во текот на овој месец“, рече Филипче.
Вакцините се произведени во Јужна Кореја.
