Русија смета дека засилената активност на НАТО во близина на границите на Русија и Белорусија е загрижувачка, рече рускиот министер за надворешни работи, Сергеј Лавров, пренесува ТАСС.
„Загрижени сме поради растечка активност на НАТО во близина на границите на Белорусија и Русија, како и поради одлуките за натамошно зголемување на воените буџети на земјите членки донесени на самитот на алијансата во Лондон. Овие чекори водат до милитаризација на Европа и се преземаат во спротивност на ветувањата дека нема да ја зајакнат сопствената безбедност на штета на безбедноста на другите“, порача тој.
Лавров посочи на акутната криза на системот за контрола на оружјето.
„Огромна штета врз архитектурата на стратешката стабилност е предизвикана од страна на САД, кои по своето повлекување од антибалистичкиот ракетен договор, го уништија договорот за ИНФ. Во прашање е иднината на новиот СТАРТ. Ние ќе продолжиме соодветно да реагираме на непријателски акции. Во исто време, Русија не бара конфронтација“, рече Лавров.
Тој истакна дека Русија се спротивставува на деструктивните политики што ги спроведуваат Вашингтон и неговите сојузници со позитивна агенда за обединување и е подготвена да го спречи појавувањето нови линии за раздвојување и да создаде зона на еднаква и неделива безбедност и широка соработка од Атлантикот до Тихиот Океан.
