ВМРО-ДПМНЕ е против грубо кршење на законот Катица Јанева да биде унапредена во републички јавен обвинител, односно да добие неколку скалила повеќе, изјави портпаролот на ВМРО-ДПМНЕ, Димче Арсовски.
Сите обвинители, додаде тој, од дувлото на непотизам наречено СЈО, во кое што во моментов е такво какво што е, каде што работат снаи, ќерки, синови, внуци роднини, пријатели на обвинителите и на СДСМ, треба да се вратат во матичните обвинителства односно институции, од онаму каде што дошле, па дури потоа да конкурираат доколку исполнуваат услови и доколку се квалитетни. Според Арсовски, СДСМ со нивниот предлог закон сака да ги унапреди своите и роднините на обвинителите од СЈО, што е грубо кршење на правото и потценување на интелигенцијата на народот.
Портпаролот рече дека ВМРО-ДПМНЕ бараме детална истрага за случајот „Рекет“, проверка на инволвираноста на Катица Јанева, односно, како што рече Арсовски, дали и колку е инволвирана во целиот случај и која е нејзината релација и врска со двајцата осомничени кои се наоѓаат сега во притвор.
„И врапчињата веќе знаат кој се е вмешан во „Рекет“, само Јавното обвинителство во моментов молчи и не презема никакви чекори. Дури потоа обвинителите од СЈО ако не се инволвирани во случајот „Рекет“ ќе може да конкурираат за во новото обвинителство притоа исполнувајќи ги другите услови кои што ќе бидат поставени и согласно законите кои што ги предвидуваат за јавен обвинител“, рече Арсовски.
Тој рече дека ВМРО-ДПМНЕ бара сите предмети од процесите коишто се започнати на ниво на обвинение до 30.06.2017 година да бидат превземени од новиот обвинител којшто ќе го води обвинителството, притоа почитувајќи го Уставот и законите.
„ВМРО-ДПМНЕ се залага сите тие предмети во фаза во која што се, дали е доказна постапка, дали е распит на сведоци, дали се завршни зборови или некоја друга фаза од текот на постапката, да ги преземе државниот јавен обвинител и истите да се прераспределат согласно процесите и советите на експертската јавност, онаму каде тие дела истите припаѓаат и треба да припаѓаат“, рече Арсовски и додаде дека ВМРО-ДПМНЕ предвидува финансиска независност за целокупното Јавно обвинителство и тоа од 0,8 до 1 процент од државниот буџет, кој што се гласа секоја година, да се одвојува за потребите на државното јавно обвинителство.
