Стево Пендаровски е заедничкиот претседателски кандидат поддржан од триесетина партии предводени од СДСМ и владината коалиција. Натпартискиот кандидат Пендаровски поддршката ја доби синоќа на средбата со партиите од коалицијата предводена од СДСМ и владината коалиција и сите поддржувачи на концептот за заеднички кандидат за претседател на државата.
По донесувањето на ова одлука, Пендаровски се огласи на Фејсбук:
„Исклучителна е честа да бидеш поддржан од претставници на сите етнички заедници, од 31 политичка партија, но, и од многу граѓани кои воопшто не се членови на политички партии.
Посебна благодарност сакам да изразам до политичката коалиција, предводена од СДСМ и лично до премиерот Заев, кои направија политички потег без преседан, по пет години да ми дадат шанса повторно да влезам во трката за претседател, откако во 2014-та, сите ние, бевме предмет на брутален изборен инжинеринг.
Почитувани граѓани, од вчера, ми дадовте голема политичка одговорност, која во месеците и годините што идат, имам намера, заедно со сите вас, да ја оправдам во целост, во интерес на подобриот и посреќен живот за сите во нашата земја“, напиша Пендаровски на Фејсбук.
Одлуката за да биде конечна треба да биде верификувана од органите на одлучување на секоја од партиите и СДСМ тоа треба да го сторат на закажаниот за утре партиски конгрес во Скопје.
https://www.facebook.com/stevo.pendarovski/posts/244111113201132