Премиерот Зоран Заев се сретна со експертот од ЕУ, Рајнхард Прибе, придружуван од амбасадорот на ЕУ во Република Северна Македонија, Самуел Жбогар.
Како што информираат од владината-прес служба, на средбата била изразена поддршка на политичкиот процес којшто завршил со договорот од Преспа и ги отворил интеграциските процеси на Република Северна Македонија.
Посебно била нагласена важноста од имплементација на реформите во правосудството и донесените закони.
Заев соопштил дека постои свесност кај Владата и силна определба да се овозможат сите потребни услови за обезбедување правда и правичност за сите граѓани.
„Резултатите во економијата, по отворените интеграции во НАТО, стануваат видливи. Но, се согласуваме дека на земјата ѝ требаат практични резултати во правосудството. Тоа значи имплементација на изгласаните закони и спроведување на потребните реформи што ќе им овозможат на правосудните органи да работат целосно независно, мотивирано, во достоинствени услови за работа. Потребно е сите во државата да го сфатат својот дел од одговорноста во овој процес“, истакнал премиерот.
На средбата било заклучено дека е потребно успешно спроведување на претстојните претседателски избори за државата да може да го задржи фокусот на потребните реформи важни за евроинтеграцискиот процес.
