Секогаш во средиштето на збиднувањата...

САД ја предупредија и Унгарија: Спречете го „Хуавеј“ во вашата земја

фото Pixabay

САД ќе бидат принудени да го намалат опсегот на некои операции во Европа и на други места ако државите од тие подрачја продолжат да соработуваат со кинеската компанија „Хуавеј“, рекол американскиот државен секретар, Мајк Помпео, во текот на посетата на Унгарија.

„Хуавеј“ е присутен и во Унгарија, а Помпео рекол дека на премиерот Виктор Орбан и на други функционери ќе им објасни дека соработката со таа компанија претставува ризик за информациската безбедност и приватноста и дека би можела да ја осуети соработката со САД.

„Асошиетед прес“ наведува дека САД се загрижени за ширењето на „Хуавеј“ во Европа, особено во членките на НАТО, како што е Унгарија, затоа што ја сметаат компанијата за голема закана.

„Унгарија е суверена држава. Носи сопствени одлуки. Важно е со нив да ги споделиме сознанијата што ги имаме за ризикот што го претставува присуството на ‘Хуавеј’ во нивните мрежи, вистински ризици за народот. Постојат ризици дека Кина може да ги употреби податоците на народот на начин што не е во најдобар интерес на Унгарија. Имаме обврска да го споделиме тоа со нив и тоа и ќе го направиме. Тоа исто така создава проблеми за американското присуство, односно ако таа опрема е присутна таму каде што има важни американски системи, ни отежнува да бидеме партнери“, рекол Помпео, пренесува АП.

САД во повеќе наврати ја обвинија Кина дека користи технологија за крадење тајни и за шпионирање, а Пекинг демантира и порача дека САД сакаат да ја задушат конкуренцијата.