Обединетите Арапски Емирати несовесно ги снабдуваат милитантите и други фракции што водат војна во Јемен со разни напредни оружја, се вели во истрагата објавена од „Амнести интернешнл“ во средата.
Во извештајот ОАЕ се опишува како главен канал за воени возила, минофрлачки системи и оружје, кои им се испраќаат на групи обвинети за воени злосторства.
Извештајот на „Амнести“ беше објавен кусо по истрагата спроведена од Си-ен-ен, која покажа дека Саудиска Арабија и ОАЕ ги снабдуваат борците на Ал каеда со американско оружје, со тоа прекршувајќи ги своите договори со САД. Министерството за одбрана на САД рече дека овие земји никогаш не добиле дозвола да пренесуваат американско оружје на трети земји.
Извештајот на Си-ен-ен исто така откри и дека американското оружје стигнало во рацете на бунтовниците поддржани од Иран во војната против коалицијата предводена од Саудиска Арабија, со што дел од воената технологија на САД му станала достапна на Техеран загрозувајќи ги животите на американските војници во други воени зони.
Според Патрик Вилкен, истражувач за контрола на оружје и човекови права во „Амнести интернешнал“, Јемен бргу станува засолниште за милитантите поддржани од ОАЕ, кои не може да се контролираат и кои се обвинети за извршување воени злосторства.
