Основното јавно обвинителство за гонење организиран криминал и корупција отвори истрага против четири лица за кои постои основано сомнение дека сториле кривично дело злоупотреба на службената положба и овластувањето при јавни набавки.
„Лицата се осомничени дека во својство на министри за земјоделство, шумарство и водостопанство и нивни заменици во одреден период склучувале договори за закуп на земјоделско земјиште, кои не ги раскинувале иако закупувачите не го плаќале надоместокот за закуп. Станува збор за досега утврдени 584 договори за закуп на земјоделско земјиште на разни локации во државата. На овој начин му била предизвикана штета на буџетот на Република Македонија во износ од 88.467.607 денари (над 1,4 милион евра)“, соопштија од Обвинитеслтвото за гонење организиран криминал и корупција.
Надлежниот јавен обвинител до кривичниот суд достави предлог-мерка притвор за четворицата осомничени. Во акција на одделот за организиран криминал на МВР уапсени се поранешните министри Ацо Спасеновски и Михаил Цветков, како и ексзаменик-министерот за земјоделство, Кристијан Делев. Четвртоосомничен во истрагата е актуелниот пратеник Љупчо Димовски.
