Владејачката партија СДСМ најавува дека 2019 е година на интензивен инвестициски циклус за развој и унапредување на патната инфраструктура низ целата држава.
„Со започнување на градежната сезона, низ целата држава продолжува изградбата и реконструкцијата на најголем дел од патната мрежа. Со инвестицискиот циклус во вредност од 1 милијарда и 270 милиони евра ќе се градат нови и реконструираат постоечки патни правци во вкупна должина од над 700 километри низ целата држава.
Продолжува изградбата на автопатот Кичево -Охрид, автопатот Миладиновци – Штип наскоро ќе биде пуштен во употреба, а интензивно се работи и на експресниот пат Градско – Дреново.
Меѓу позначајните проекти за оваа година се: изградбата на автопатската делница Скопје – Блаце, втората фаза од експресниот пат Штип – Радовиш и третата фаза од експресниот пат Градско – Прилеп и реконструкција и рехабилитација на бројни патни правци низ целата држава.
Развојот на инфраструктурата и модернизацијата на патиштата го олеснуваат животот на граѓаните и влијаат позитивно врз економскиот раст и конкурентноста.
СДСМ како одговорна партија останува посветен на унапредување на патната инфраструктура со цел да се обезбеди брз, ефикасен и безбеден сообраќај за сите граѓани“, велат од СДСМ.
