Делегација на Владата предводена од вицепремиерот задолжен за економски прашања, Кочо Анѓушев, од денеска до 26 овој месец ќе учествува на настани во рамките на „Конференција за економија: Балканот и Европската Унија – Петогодишен циклус на Берлинскиот процес“ што се одржува во Будва, Црна Гора.
Како што информираат од владината прес-служба, вицепремиерот Анѓушев во текот на утрешниот ден ќе се обрати на панелот „Економска и европска перспектива на Балканот“, на која е најавено учество и на претседателот на Владата на Црна Гора, Душко Марковиќ, претседателот на Советот на министри на БиХ, Денис Звиздиќ, претседателот на Владата на Република Косово, Рамуш Харадинај, и претседателката на Владата на Република Србија, Ана Брнабиќ.
Во состав на македонската владина делегација е и министерот за економија, Крешник Бектеши, кој утре ќе учествува на панелот „Регионална соработка како сегмент на европските интеграции: економијата – генератор на севкупниот развој“, заедно со другите министри од регионот задолжени за економски прашања.
Во рамките на настанот, членовите на делегацијата ќе остварат и билатерални средби со политички и бизнис-лидери од регионот.