Пол Манафорт, поранешниот шеф на предизборната кампања на претседателот на САД, Доналд Трамп, според судски документи, се согласил да ја признае вината по две точки од обвинението на специјалниот обвинител Роберт Мулер, што би било нов удар за Трамп во долгата истрага за руското влијание врз претседателските избори во САД од 2016 година.
Во рамки на договорот, 69-годишниот Манафорт би можел да се обврзе да соработува во истрагата на Мулер, за улогата на Русија во изборите, во однос на тоа дали штабот на Трамп бил во дослух со Русите за време на кампањата.
Според документи од судот во Вашингтон, Манафорт ќе се изјасни за виновен по една точка од обвинението за заговор против САД и една точка од обвинението за заговор поради попречување на правдата. Во новото судско обвинение додадени се пет дополнителни точки.
Судот во Вирџинија минатиот месец го осуди Манафорт за банкарски и даночни измами.
Одлуката на Манафорт би можела да биде голем удар за Трамп, кој минатиот месец го пофали својот поранешен помошник, бидејќи тој не се договори со обвинителите како наговиот поранешен адвокат, Мајкл Коен.
Трамп на 22 август на „Твитер“ напиша: „За разлика од Мајкл Коен, тој одби да изнесе измислени приказни за да се договори. Голема почит за овој храбар човек“.
