Време е ВМРО-ДПМНЕ да се надмине себеси и наместо да шири невистини, да се вклучи во процесите за членство на Македонија во ЕУ и НАТО, велат во соопштение од владејачкиот СДСМ.
Оттаму додаваат дека иднината на Македонија и нејзините граѓани се над сите политички партии и дека влезот во ЕУ и НАТО со заштитен македонски идентитет е многу поголемо прашање од дневно-политичките полемики.
„Не е точно дека со постигнатиот Договор со Грција се загрозуваат македонскиот идентитет и македонската посебност. Не е точно ниту дека се бришат поимите Македонија и македонски. Напротив, со Договорот термините Македонец, македонската, македонски се трајно заштитени и никој повеќе нема да може да ги негира или оспорува“, се наведува во партиското соопштение.
Од СДСМ додаваат дека според членот 7 од Договорот, македонскиот идентитет ги отсликува територијата, јазикот, народот, со сите атрибути, со своја историја, култура и наследство.
