Дмитриј Песков, портпаролот на рускиот претседател, Владимир Путин, денеска изјави дека од САД нема никакви сигнали дека сакаат подобрување на односите со Русија.
Песков со кратко „не“ одговорил на прашањето дали има какви било сигнали од американската администрација кои покажуваат дека оттаму постои желба за компромис или избегнување на следната фаза на санкции во врска со аферата „Скрипал“, пренесе агенцијата „Тасс“.
Весникот „Вашингтон пост“ претходно објави дека американскиот државен секретар, Мајк Помпео, барал средба со рускиот министер за надворешни работи, Сергеј Лавров, со цел да разговараат за клучните прашања во односите Москва-САД.
Портпаролката на руското Министерство за надворешни работи, Марија Захарова, денеска соопшти дека се работи на организирање средба меѓу Помпео и Лавров за време на седницата на Генералното собрание на ОН во Њујорк следниот месец, но дека сè уште не се усогласени времето и агендата на состанокот.
САД неделава воведоа нови санкции кон Русија поради наводната вмешаност на Москва во труењето на поранешниот двоен агент Сергеј Скипал во Англија.
