Министерот за надворешни работи, Никола Димитров учествуваше на конференијата на Комисијата за европски прашања на националните парламенти на земјите-членки на ЕУ и на земјите-кандидати во Софија, која се одржува во рамките на ротирачкото бугарско претседавање со Советот на Европската унија.
Димитров се заблагодари на бугарското претседателство за поддршката и ги претстави историските исчекори кои Република Македонија ги презема во контекст на затворање на отворените прашања со своите соседи, како и последните преземања на планот на домашни реформи, што се сериозна потврда за еден процес на созревање на земјата.
“Ова е Регион кој географски не е на маргините на ЕУ, туку остров опкружен со земји членки на ЕУ. Самото тоа е доволен аргумент дека политичкиот фокус на ЕУ кон Регионот, исто така не треба да биде маргинален…И ваквото внимание ние немаме луксуз да не го сфатиме сериозно” рече Димитров.
Димитров оствари и неколку билатерални средби и куси разговори со парламентарци од повеќе земји членки на ЕУ, како и со својот домаќин Кристиан Вигенин и МНР Екатерина Захариева, која се обрати на истата сесија заедно со Министерот. Министерот засебни средби оствари со француската парламентарка и претседателка на Комисијата за европски прашања на Националната асамблеја на Франција, Сабин Тилеј, со холандската парламентарна делегација, предводена од претседателот на Комитетот за европски прашања во холандскиот претставнички дом, Малик Азмани, а имаше и работен ручек со членови од германската парламентарна делегација, предводена од претседателот на Комитетот за ЕУ прашања во германскиот Бундестаг, Гунтер Крихбаум, како и разговори со Лилијана Танги.
За време на средбите, Димитров информираше за постигнатиот историски исчекор во контекст на односите со Грција и за претстојните чекори и предизвици на тој план и замоли за поддршка од европските партнери за отворање на европскиот пат за Република Македонија, кој е од суштинско значење во претстојниот период во однос на натамошна имплементација на договорот со Грција.
Позитивната одлука на ЕУ ќе биде истовремено и целосно заслужена валоризација на реформските резултати на домашен план. Од соговорниците беа упатени честитки за покажаното водство, искрена политичка волја и храброст во постигнувањето на заемно прифатливо решение меѓу Република Македонија и Грција.
