Министерот за надворешни работи на Турција Мевлут Чавушоглу очекува Турција да привлече околу 50 милиони туристи до 2023 и со тоа да донесе прилив во буџетот од околу 50 милијарди долари.
Чавушоглу говореше на настан во Анталија, организиран од Асоцијацијата за инвестиции во туризмот во Турција, каде изјави дека бројот на туристи во 2018 значително е пораснат.
„Забележуваме значителен пораст во бројот на туристи годинава. Затоа, чекор по чекор сакаме да се доближиме до 50 милиони. Се надеваме дека ќе достигнеме до 50 милиони туристи и 50 милијарди долари прилив до 2023,“ изјави Чавушоглу.
Чавушоглу додаде дека на социјалните мрежи кружат дезинформации дека Турција сака да ги затвори министерствата за култура и за туризам. Тој појасни дека овие гласини се неточни, но дека владата размислува дали истите да ги спои во една институција.
„Мислењата на оваа тема се поделени,“ рече Чавушоглу.