Премиерот, Зоран Заев, придружуван од министерот за земјоделство Љупчо Николовски, заменикот министерот за животна средина, Јани Mакрадули и советникот на премиерот за животна средина Драган Јованов, денеска се придружија на градоначалникот и граѓаните на Дојран во акцијата за уредување на општината.
„Чест и задоволство ми е, денеска , од Дојран, еден од бисерите на македонската автентичност, да покажеме дека здружените граѓански акции придонесуваат за покревање на духот на заедништвото и за поубава Македонија. Дојран заслужува вакво внимание, посветеност од локалната самоуправа, од заедницата, но и од мене како премиер, заради населението кое живее тука, но и заради илјадниците туристи кои доаѓаат за одмор и релаксација во оваа прекрасна македонска општина“, рече Заев.
Тој додаде дека туристичките центри, каков што е Дојран, се лицето на Македонија пред туристите. „Навидум малите нешта како оваа акција денес, нè зближуваат како луѓе и нè прават единствени во грижата за локалната заедница. Овие се тие европски манири за кои зборуваме, ова значи да се донесе Европа тука, дома, во Македонија“, рече Заев.
Тој ги повика сите општини, сите локални самоуправи, почесто да организираат вакви конкретни акции кои, како што рече, значат директна помош за подобар живот на граѓаните.
