СДСМ и Зоран Заев, наместо да работат, посветени се на гола реторика и креваат непотребна еуфорија со цел прикривање на реалната состојба во општеството и економијата, која е катастрофална. Ваков е коментарот на ВМРО-ДПМНЕ по обраќањето на Заев во Собранието.
„Државата доби само враќање на позитивната препорака на ЕК за почеток на преговорите на Република Македонија за влез во ЕУ, што ја добиваше 6 години во низа, за последните 2 да бидат условени, токму поради политичката криза во која СДСМ ја втурна државата. ВМРО-ДПМНЕ, спротивно на СДСМ, не создаде политичка криза и помогна државата да ги исполни потребните реформи. Нивото на реализација на планот 3-6-9 на истекот на деветтиот месец беше едвај 50 отсто по што мораше ВМРО-ДПМНЕ да помогне и работите да тргнат од мртва точка“, се вели во реакцијата на опозицијата.
Според оваа партија, Социјалдемократскиот сојуз покажал дека нема капацитет реално да ја придвижи државата напред, а планот 18 е уште нова колективна хипноза, која има цел да претстави дека Владата нешто работи.
