Советот за следење на имплементацијата на стратегијата за реформи на правосудниот сектор вчера попладне ја одржа својата втора седница. По усвојувањето на записникот од конститутивната седница, Советот го усвои и деловникот за работа.
„Членовите на Советот своите дебати на втората седница ги насочија кон предлог-законите за судовите и за Судскиот совет за кои заменик-министерот за правда, Оливер Ристевски, појасни дека веќе в среда, по празниците, пратениците во Собранието на РМ ќе расправаат по предложените измени“, информира владината прес-служба.
Во дискусиите на членовите на Советот, како што стои во соопштението, акцент бил ставен на предложените законски одредби што се однесуваат на одговорноста на судиите, како и на предложените членови во предлог-законот кои се однесуваат на нивната заштита, а сè со цел да се постигне што поголема независност на судството и враќање на дигнитетот на судиите.
„Заложбите на членовите на Советот за реформи е во склад со извештајот на Прибе, а во кој се сугерира судиите да се оценуваат исклучиво врз основа на донесените пресуди. Членовите на советот имаа одредени забелешки и за предлог-законот за Судскиот совет на Република Македонија“, се вели во соопштението.
На вчерашната втора седница на Советот присуствуваа и претставници на ОБСЕ, кои најавија нивно редовно присуство и поддршка и во наредниот период.
