Намалувањето на цените на лековите е проект на ВМРО-ДПМНЕ, не на СДСМ. СДСМ само парцијално го спроведува проектот на ВМРО-ДПМНЕ, реагираат денеска од опозициската партија.
„Мерката за намалување на цената на лековите е почната во 2012 година. Истата се спроведуваше двапати годишно и со неа беа опфатени над 4.800 лекови, кај кои цените повеќепати се намалувани. Заштедата во џебот на граѓаните со оваа мерка изнесува над 33 милиони евра. СДСМ наместо во целост да го продолжи овој успешен проект, кој донесе заштеди кај граѓаните, тие нудат парцијални решенија“, се вели во партиското соопштение.
Од ВМРО-ДПМНЕ истакнуваат дека доколку СДСМ навистина работи во интерес на граѓаните, намалувањето ќе го прави два пати годишно, а не еднаш.
„Граѓаните ја гледаат безидејноста и неспособноста на власта. СДСМ ветуваше итни и интервентни мерки во здравството во првите шест месеци од преземањето на власта, како бесплатно болничко лекување и покачување на платите на лекарите и медицинските работници за 15%. СДСМ излажа. СДСМ не направи ништо за здравството. Бесплатно болничко лекување нема. Платите на лекарите и медицинскиот персонал не само што не се покачени туку во одредени здравствени установи беа исплатени и помали плати. СДСМ го уништува македонското здравство“, реагираат од опозициската партија.
