Случајот со труењето на рускиот шпион Скрипал и потегот со исклучување на интернетот на основачот на Викиликс, Џулијан Асанж, кој се наоѓа во амбасадата на Еквадор во Лондон од 2012 година, се дел од пошироки мерки со кои се крши слободата на говорот, а еволуира ризикот за вистинска војна, оценува австралискиот истражувачки новинар и режисер Џон Пилџер за „Раша тудеј“.
„Ова е војна против слободата на говорот, на овој човек му е одбиено најосновното право – слобода на говорот. Тоа е дел од една поширока војна против познати непријатели, а Русија е една од нив, Кина е друга”, вели Пилџер.
Еден извор близок до Викиликс изјавил за „Раша тудеј“ дека Еквадор го прекинал интернетот на Асанж поради неговиот твит за апсењето на поранешниот каталонски лидер Карлес Пучдемон во Германија. Пилџер тврди дека начинот на кој западните медиуми наместо да ја вршат својата работа, слепо го поддржуваат официјалниот став за настаните во Салсбери, е уште еден пример на глобална пропаганда.
„Тоа е дел од пропагандната војна што го претставува нападот во Салсбери. Тука имаме руски дипломати кои се протерани низ целиот свет врз основа на никакви докази”, вели тој.
Поранешниот руски двојник Сергеј Скрипал и неговата ќерка беа отруени и најдени паднати во несвест во домот во Салсбери. Владата на Велика Британија ја обвини Русија за нападот, но Москва ги негира обвинувањата нагласувајќи дека не се презентирани докази за инцидентот. По повиците од Лондон, речиси 30 држави објавија дека ќе ги протераат руските дипломати за случајот.
Пилџер вели дека Асанж бил критикуван од британската влада зашто рекол дека Велика Британија води лоша дипломатија за да ги истера руските претставници без независна потврда за нејзината брза истрага.
