Поранешната приправничка на Белата куќа, Моника Левински, по 20 години се огласи за аферата со претседателот Бил Клинтон изјавувајќи дека се работело за очигледна злоупотреба на моќта, а не за сексуален напад.
Левински во интервју за магазинот „Венити фер“ раскажа дека имала посттрауматски стрес и дека долго време ѝ било тешко да излезе надвор.
Таа открива дека една од водечките жени на движењето #MeToo ја охрабрила да ја раскаже својата приказна.
„Сега кога имам 44 години, сфаќам која е разликата во моќта на еден стажист и на претседател на држава во Белата куќа. Тогаш бев на почетокот од своите 20-ти години и си дозволив да минам некоја граница на интимна и емоционална поврзаност со Клинтон“, вели Левински и додава дека Клинтон тогаш бил во цветот на кариерата, а таа на првата работна позиција по колеџот.
Левински открива дека за време на истрагата не смеела да говори за себе и да се брани. Вели дека настаните од 1998 година биле траума за нацијата и во тие моменти се чувствувала осамено.
Клинтон, против кого беше поведена постапка за отповикување, во август во 1998 година призна дека имал несоодветен однос со младата приправничка во Белата куќа.