Според „Њујорк тајмс“, 12 украински пилоти се очекува ова лето да бидат подготвени да летаат со борбени авиони Ф-16 по десет месеци обука во Данска, Велика Британија и САД.
Сепак, до враќањето на пилотите во Украина, ќе бидат испорачани само шест од вкупно 45 авиони што европските сојузници му ги ветија на Киев.
Обуката на украинските пилоти започна во август минатата година во воздухопловната база Скридструп во јужна Данска, но беше забавена поради недостатоците во јазичните вештини и познавањето на западните техники на летање. Така, пилотите биле подготвени за летот дури во јануари, според данските власти.
Украинците беа испратени во Данска бидејќи тренинг центарот Фетести во Романија не беше отворен кога пилотите беа подготвени да стартуваат. Данскиот министер за одбрана изјави за NYT дека обуката напредува добро и дека украинските пилоти веќе летаат над данскиот воздушен простор, но додаде дека нивниот напредок на крајот ќе зависи од должината на обуката.
Должината на обуката на пилоти ги загрижува официјалните лица, како и тоа како Украина ќе добие доволно луѓе кои ќе можат правилно да ги одржуваат авионите. Она што е познато е дека обуката на украинските пилоти на софистицирани западни авиони се одвивала со молскавична брзина, кондензирајќи ги годините на учење во училница, симулации и вежби за летање за неколку месеци.
Исто така, пишува NYT, речиси 50 украински техничари се обучуваат во Данска за поддршка и поправка на авиони и ракување со нивните пакети со оружје. Причината е што авионот Ф-16 е толку сложен што генерално потребни се од осум до 14 луѓе за одржување на секој.
Официјални лица рекоа дека западните одбранбени изведувачи ќе мора да ги следат авионите до Украина и да останат со нив додека нема доволно украински посади за соодветно да ги одржуваат, процес кој може да трае со години. Отежнувачка околност е потребата да се поправат застарените и оштетени од војната воени авиони на Украина, што може дополнително да го одложи влегувањето на Ф-16 во војната.
Досега Данска, Холандија, Норвешка и Белгија се обврзаа да испратат околу 45 авиони во Украина, што е доволно за три мали ескадрили. Данска ги испраќа првите шест кон крајот на пролетта, а уште 13 треба да пристигнат до крајот на оваа година и во 2025 година. Другите земји не одредиле датум за испорака на нивните Ф-16. Холандија, која вети 24, ќе ги задржи додека Украина не биде подготвена да ги прими, изјави Јуријаан Есер, портпарол на холандското Министерство за одбрана.
