Смртта на деца од огнено оружје во САД достигна рекордно ниво, покажува новото истражување објавено од Американската академија за педијатрија (ААП).
Користејќи ја базата на податоци за смртност на Центрите за контрола и превенција на болести, студија објавена во списанието Педијатрија на AAP покажа дека 4.752 деца починале од прострелни рани во 2021 година, последната година за која се достапни податоци.
Ова е зголемување во споредба со 4.368 во 2020 година и 3.390 во 2019 година. Од 2020 година, оруженото насилство е водечка причина за смрт кај децата во САД. Ени Ендрјус, педијатар од Јужна Каролина, рече дека никогаш не помислила дека „ќе се грижи за толку многу деца со рани од куршуми“. Студијата покажа дека афроамериканските деца биле вклучени во околу 67 отсто од убиствата со оружје, а белите деца биле вклучени во 78 отсто од самоубиствата со оружје.
Бил Ли, гувернерот на Тенеси, каде што имаше масовно пукање во училиште претходно оваа година, побара од членовите на Конгресот да го поддржат т.н. Закон за црвено знаме кој забранува поседување оружје од страна на загрозени лица. Но, тој се соочи со отпор од колегите републиканци кои го контролираат Претставничкиот дом.
Во соопштението од вторникот, Здружението за огнено оружје во Тенеси изрази загриженост дека „некои републикански пратеници рекоа дека нема да гласаат за законодавството за црвено знаме, но уште помалку рекоа дека нема да гласаат за ниту еден закон што може негативно да влијае на правото на поседување оружје заштитено со вториот амандман.
