Хрватската полиција и УСКОК извршија голема рација во просториите на Хрватската електроенергетска компанија (ХЕП), при што беа пронајдени документи во кои евидентно е дека ХЕП купувал гас по повисоки цени, а потоа го продавал поевтино како вишок.
Според Индекс.хр, поради државните регулативи, ХЕП мораше да го купи целиот гас што го произведува ИНА по цена од 47,6 евра.
Кога магацините веќе беа полни, вишокот остана во транспортниот систем и се продаваше по цени од еден евроцент до 34 евра.
Хрватски Национал денеска објави дека раководството на ХЕП во четири наврати од јануари предупредило на потенцијални вишоци, но Министерството за економија не ја променило регулативата според која ХЕП мора да го набавува целиот гас по фиксна цена.
Власта тоа го смени дури минатата недела, по избивањето на аферата.
Како што тврди Национал, првиот човек на ХЕП, Фране Барбариќ, залудно детално ги информирал за драматичниот развој на проблемот, чиј обем поради продажбата на складираниот гас по ниски цени, може да достигне 200 милиони евра загуби за ХЕП.
Исто така, се додава дека во писмото од 13 февруари, Барбариќ побарал од хрватскиот премиер Пленковиќ и министерот за економија Филиповиќ итно да ги спречат загубите на ХЕП поради неопходната продажба на вишокот гас по цени „кои може да бидат значително пониски од набавните цени“.
