Делегацијата од Белград, предводена од директорот на Канцеларијата за Косово и Метохија, Петар Петковиќ, отпатува за Брисел, каде што денеска ги очекува нова рунда дијалог со Приштина.
Како што е најавено, Петковиќ најпрвин треба да се сретне со специјалниот пратеник на ЕУ за дијалог меѓу Белград и Приштина, Мирослав Лајчак, во зградата на Европската служба за надворешни работи (ЕЕАС), по што директни разговори со белградската делегација се планирани и во Приштина.
Лајчак вчера на „Фејсбук“ објави дека за време на неодамнешната средба во Приштина како дел од подготовките за денешната нова рунда дијалог на техничко ниво во Брисел го информирал премиерот на привремените институции во Приштина, Албин Курти, за важноста на избегнување каков било некоординиран потег што може да го наруши процесот на нормализација.
Тој ја истакна потребата целосно да се фокусира на нормализација и имплементација на бриселскиот договор и анексот договорен во Охрид.
Тој се осврна и на посетата на Белград, каде што во петокот се сретна со српскиот претседател Александар Вучиќ и со Петар Петковиќ.
„За време на нашата средба разговаравме за натамошната имплементација на договорот од 27 февруари и неговиот анекс од 18 март, со цел да се подготвиме за средбата во Брисел што ќе се одржи утре“, објави словачкиот дипломат на „Фејсбук“.
Тој изрази очекување дека двајцата главни преговарачи ќе бидат подготвени да договорат конкретни следни чекори кон имплементација на договорот.
