Кинескиот претседател Си Џинпинг следната недела ќе одржи самит без преседан во земјата со лидерите на пет поранешни советски републики во Централна Азија, додека Пекинг се обидува да го зајакне своето влијание во регионот долго под руско влијание.
Самитот „Кина-Централна Азија“, прв од ваков вид, ќе ги собере лидерите на Казахстан, Киргистан, Таџикистан, Узбекистан и Туркменистан, соопшти утринава Министерството за надворешни работи на Кина.
Средбите ќе се одржат на 18 и 19 мај во северниот град Ксиан, почетната точка на древниот пат на свилата. Кина веќе го најави овој самит, но датумите досега не беа познати. Русија ја смета Централна Азија за свој „двор“ од средината на 19 век, но Кина, Турција и западните земји сакаат тие земји да станат нивни регионални сојузници.
Овој тренд се забрза по руската инвазија на Украина, иако Москва задржа силни лостови на влијание. Авторитарните централноазиски земји поканети од Пекинг се дел од „Новите патишта на свилата“, огромен проект за патна, железничка и пристаниште инфраструктура што го започна Кина.
Зголеменото влијание на азискиот гигант во регионот предизвикува и недоверба кај населението, особено во Киргистан и Казахстан. Репресијата на кинеската влада во нејзината провинција Ксинџијанг против Ујгурите – претежно муслиманска етничка група која исто така живее во Централна Азија – е една од причините за ова.
Како знак на зголемениот интерес на Пекинг за Централна Азија, минатата година претседателот Си Џинпинг го избра Казахстан за неговото прво патување во странство од почетокот на пандемијата на Ковид.
