Авионот на кинескиот претседател Си Џинпинг слета на меѓународниот аеродром Внуково во Москва, а самиот лет предизвика голем интерес.
Летот на „боинг 747“ го следеа во живо повеќе од 81.000 луѓе на веб-страницата „Флајтрадар24“, што го направи најследен лет во светот.
Си главно користи комерцијален Боинг изнајмен од „Ер Чајна“ за патувања на долги релации.
Само неколку дена откако Меѓународниот кривичен суд во Хаг издаде налог за негово апсење, рускиот претседател Владимир Путин го пречекува кинескиот лидер во Москва „со цел да игра конструктивна улога во промовирањето мировни преговори за војната во Украина“.
Кинескиот претседател денеска ја започнува посетата на Русија, што е негова прва посета на странска земја откако по трет пат беше избран за претседател на Кина, а воедно и прва посета на Русија од почетокот на руско-украинскиот конфликт во февруари 2022 година.
Посетата ќе ги постави основите за развој на кинеско-руските односи во следните пет години и ќе го продлабочи меѓусебното разбирање меѓу Москва и Пекинг за важни меѓународни и регионални прашања, пренесува „РИА Новости“.
„Волстрит журнал“, повикувајќи се на свои извори, објави дека по посетата на Москва, Си Џинпинг би можел да одржи онлајн средба со претседателот на Украина, Володимир Зеленски.
