Еден од најбогатите руски бизнисмени предупредува дека финансиските неволји во кои се наоѓа Русија би можеле да кулминираат во 2024 година и испрати апел за помош до пријателските земји.
– Нема да има пари следната година – изјави олигархот Олег Дерипаска вчера на Економскиот форум Краснојарск во Сибир, пренесоа руските медиуми.
– Ќе ни требаат странски инвеститори.
Форбс го наведе 55-годишниот алуминиумски тајкун и индустријалец како најбогат човек во Русија и деветти најбогат човек во светот во 2008 година, пред финансиската криза. Неговото богатство во јуни 2022 година беше проценето на 3,2 милијарди долари. Дерипаска рече дека изградбата на „државен капитализам не е опција“ и предупреди на „сериозни“ санкции.
– Русија треба да продолжи да развива пазарна економија – рече тој.
– Странските инвеститори ќе гледаат како руските инвеститори заработуваат, какви услови постојат – додаде тој. Тој, исто така, предупреди на тешкотиите што ги предизвикува влегувањето на нови пазари управувани од таканаречените пријателски нации, објави Интерфакс, невладина медиумска куќа за вести во Русија.
– Многу е тешко. Правилата на игра се поинакви – изјави Дерипаска.
– Доколку правилата на СТО (Светската трговска организација) не важат за руските претприемачи, тогаш мораме да се префрлиме на билатерални договори. Ќе има проблеми со калкулациите, притисокот од санкции ќе биде сериозен.
Неговите зборови на Твитер ги упати портпаролката на украинскиот претседател Володимир Зеленски, Јулија Мандел, која ги објави коментарите на Дерипаска со натпис: „Каква дрскост!
Се чини дека ставот на Дерипаска е во спротивност со финансиските намери на рускиот претседател Владимир Путин, кој на руското Министерство за одбрана непосредно пред Божиќ му рече дека неговата земја „нема ограничувања за финансирање“.
– Земјата и владата обезбедуваат се што ќе побара армијата – рече Путин.
Бруто домашниот производ (БДП) на Русија се намали за 2,2 отсто во 2022 година, но дефицитот не беше блиску до проценките на светските лидери, како што се американскиот претседател Џо Бајден и други, дека националниот БДП ќе се намали за 10 или 15 отсто.
Сепак, санкциите наметнати од САД и други земји имаат широко влијание врз руските граѓани. Истражувањето објавено од независната московска истражувачка група Chronicles покажа дека колку подолго трае војната, толку повеќе Русите се свртуваат против неа, пишува Newsweek.
