Украинските вооружени сили тврдат дека од почетокот на руската инвазија на Украина се убиени повеќе од 100 илјади руски војници. Во последните информации за руските загуби, се наведува дека од почетокот на војната се „ликвидирани“ 100.400 руски војници, а во текот на вчерашниот ден загинале 660 војници.
Украинското Министерство за одбрана ја истакна својата објава на Твитер како „неверојатна случајност“ со оглед на тоа што Русија наводно одликувала 100.000 војници во последните 10 месеци. Руската инвазија на Украина започна на 24 февруари, а Русите ретко споделуваа информации за своите жртви.
Украинските сили тврдат дека уништиле вкупно 3.003 тенкови, 1.978 артилериски системи и 283 авиони. „Слава на Украина! На 302. ден продолжува херојскиот отпор на украинскиот народ на големата инвазија на руската армија“, соопшти Генералштабот на украинската армија.
