Високиот претставник на Европската Унија за надворешна политика и безбедност, Жозеп Борел, денеска апелира да се смири ситуацијата на северот на Косово и ги повика Белград и Приштина да се вратат на разговорите за европскиот предлог за дијалог.
„Апсолутно е важно да се запрат ваквите проблеми, да се отстранат барикадите, да се смири ситуацијата и да се вратиме на дискусијата за предлогот што го ставивме на маса, со цел да се најде трајно решение за тензиите меѓу Приштина и Белград“, рече Борел по пристигнувањето на состанокот на Европскиот совет во Брисел.
Борел рече дека ќе ги информира европските лидери за ситуацијата и разговорите што претходните два дена ги имаше специјалниот пратеник на ЕУ, Мирослав Лајчак, во Белград и во Приштина.
„Последниве неколку дена се соочуваме со големи проблеми на северот на Косово… Повикувам на смирување на ситуацијата и враќање на дијалогот, што е единствениот пат за европската перспектива на Косово и на Србија“, рече Борел.
Шефот на европската дипломатија изрази надеж дека европските лидери денеска ќе се договорат за доделување кандидатски статус на Босна и Херцеговина, што би било важен чекор за таа земја и за целиот регион.
„Силно го поддржувам тоа. Тоа ќе биде добра можност за водачите на БиХ да продолжат со реформите и земјата навистина да почне на европскиот пат“, рече Борел.