Висок американски функционер изјави дека Русија користи муниција стара 40 години и затоа се соочува со висока стапка на неуспех.
– Тие црпеа муниција од застарени залихи, што покажува дека се подготвени да ја користат таа постара муниција, од која дел првично беше произведена пред повеќе од 40 години – изјави денеска функционер кој сакаше да остане анонимен.
– Со други зборови, користите муниција и ги вкрстувате прстите и се надевате дека таа пука или експлодира кога ќе падне – додаде неименуваниот функционер. Се проценува дека Русија ќе ги искористи своите целосно употребливи резерви на муниција до почетокот на 2023 година, доколку не прибегне кон странски добавувачи и постари залихи, пренесува Скај њуз.
– Ова го оценуваме во однос на брзината со која Русија ја употреби својата артилерија и ракетна муниција, односно нејзината целосно употреблива артилерија и ракетна муниција. Веројатно тоа би можеле да го направат до почетокот на 2023 година – заклучи службеникот. Рускиот претседател Владимир Путин во ноември призна дека оружјето што го користи руската армија треба да се модернизира.
Украина не се соочува со таков проблем на застарено оружје бидејќи западните сојузници го снабдуваа Киев со залихи со оружје преку воена помош по почетокот на инвазијата. Така, минатиот месец, Соединетите Држави одобрија испраќање дополнителни 400 милиони долари воена помош за Украина, вклучувајќи оружје, муниција и опрема за противвоздушна одбрана.
