И покрај унгарското противење, членките на Европската унија во саботата гласаа за ослободување на заеми од 18 милијарди долари за да и помогнат на Украина да се справи со трошоците од руската инвазија, велат извори запознаени со ова прашање.
Првично дизајниран како хуманитарен пакет за кој ќе биде потребна обединета поддршка од сите 27 членки на Европската унија, помошта подоцна беше преработена како грантови гарантирани од поединечни земји-членки – спротивно на буџетот на ЕУ – за да се избегне унгарското вето.
Во вторникот на состанокот на министрите за финансии на земјите-членки на ЕУ, Унгарија ја блокираше макроекономската финансиска помош за Украина во износ од 18 милијарди евра, обидувајќи се да добие одобрение за средства од кохезионите фондови и механизмот за закрепнување од пандемијата, која може да се замрзне бидејќи не се исполнети обврските во делот на владеењето на правото.
Чешкото претседателство поради унгарската блокада го тргна од дневниот ред целиот пакет. Комесарот за буџет Јоханес Хан рече дека Комисијата ќе се обиде да најде решение за Украина до следниот месец, можеби преку механизмот на засилена соработка, што е еден начин да се избегне вето.
Но, во тој случај земјите-членки треба да дадат гаранции во своите национални буџети, а за тоа во некои држави е потребна одлука на нивните парламенти за што може да биде потребно време.
Будимпешта бара начин да ги забави некои од акциите на ЕУ во последните месеци, незадоволна што ЕУ замрзна милијарди евра во Унгарија поради загриженоста дека не се придржува до владеењето на правото.
Европската комисија предложи замрзнување на 7,5 милијарди евра од кохезионите фондови на Унгарија во рамките на новиот механизам според кој користењето на средствата од европските фондови е условено со почитување на владеењето на правото. Одлуката за предлогот за замрзнување на средствата на Унгарија треба да биде донесена најдоцна до 19 декември.
