Германскиот канцелар Олаф Шолц го предупреди Западот да „избегне создавање нова Студена војна со делење на светот на блокови“. Во написот за магазинот „Форин аферс“, германскиот канцелар повика „да се вложат максимални напори за градење нови партнерства“.
Истакнувајќи ги Кина и Русија како две земји кои претставуваат закана за мултиполарниот свет, тој рече дека мора да има посилно европско и трансатлантско единство.
„Западот мора да се залага за демократските вредности и да ги заштити отворените општества. Исто така, мора да го избегнеме искушението повторно да го поделиме светот на блокови“, напиша тој.
„Ова значи да се вложат максимални напори за градење нови партнерства, прагматично и без идеолошки пречки“, додаде тој.
„Германците имаат намера да станат гарант на европската безбедност, каква што очекуваат нашите сојузници, и градител на мост во Европската Унија и поборник за мултилатерални решенија за глобалните проблеми“, напиша Шолц.
