Германскиот канцелар Олаф Шолц рече дека верува оти земјите на ЕУ би можеле да најдат решение за спречување на скоковите на цената на гасот, додека Грција ги повика министрите за енергија на ЕУ да постигнат договор за ова прашање кога ќе се состанат следниот месец. Енергетската криза – што се влоши со намалувањето на испораките на гас на Русија за Европската унија по санкциите на Западот поради војната на Москва против Украина – се заканува со рецесија во Европа додека се опоравува од ковид пандемијата, пренесуваат локални медиуми.
Министрите на Европската унија се борат да договорат начин да ги ограничат цените на природниот гас и да им помогнат на своите граѓани да се справат со инфлацијата. „Сè уште има работа за министрите за енергија, особено кога станува збор за избегнување скокови на цените“, рече Шолц по средбата со грчкиот премиер Киријакос Мицотакис во Атина.
„Сакаме заеднички да ги намалиме цените на гасот, нашиот заеднички став е дека тоа не е нешто многу апстрактно… и верувам дека нешто ќе се најде. Но, тоа не се прави само со одмавнување на рака“, рече тој. Околу 15 земји од ЕУ, вклучително и Грција, сакаат ограничување на цените ширум ЕУ, наведувајќи го инфлацискиот притисок што неодамнешните скокови на цената на гасот го извршија врз нивните економии.
Германија, најголемата европска економија, предводи мала група земји кои се против ограничувањата на цените. Мицотакис рече дека земјите од ЕУ веќе постигнале напредок по ова прашање и дека ќе биде „неуспех“ доколку министрите за енергетика не одлучат на состанокот на 24 ноември дали да побараат од Брисел да предложи ограничување.
„Не сакаме ова прашање да им се врати на претседателите на државите и владите на ниво на Советот на ЕУ. Сакаме да се реши на ниво на министри и може да се реши на ниво на министри“, рече тој. Германскиот канцелар порача дека солидарноста е единствениот начин за надминување на енергетската криза.
Германија, исто така, го гради својот капацитет за течен природен гас (LNG) и нејзините терминали ќе можат да ги снабдуваат своите европски соседи од 2023 година, додаде тој.
