Хрватскиот претседател Зоран Милановиќ изјави дека е против идејата за обука на украински војници во Хрватска. Милановиќ присуствуваше на свечената инаугурација на ректорот на Универзитетот во Загреб, Стјепан Лакушиќ.
– Не ја поддржувам таа идеја затоа што не го поддржувам вмешувањето на Хрватска во оваа војна повеќе отколку што треба. Ние сме коректни, обединети сме и тоа е тоа. Не подалеку од тоа. Јас како врховен командант нема да го одобрам. Не сум слушнал за предлогот, но однапред кажувам дека не ми се допаѓа, тоа и носи војна на Хрватска – изјави Милановиќ, пренесува N1 Хрватска.
Тој изјави дека однапред кажува дека такво нешто не треба да се прави.
– И за се што имаме намера да донираме, немам никакво влијание на тоа. Тоа се материјални средства, тоа го одредува владата. Тоа го поддржувам само ако многу јасно сакаме да добиеме средства за замена. Не можам да поддржам одземање на крвотокот на хрватската одбрана. Хрватската одбрана е на прво место, потоа долго време ништо, па НАТО и потоа другите – додаде тој.
Милановиќ низ смеа го коментираше и денешниот инцидент во парламентот кога за малку ќе дојдеше до физичка пресметка меѓу претставниците на Мира Буљ и Хрвоје Зекановиќ.
– Не се карајте во парламентот, излезете надвор и убаво тепајте се. Нека се тепаат конечно, забавно е. Никогаш нема да се борат, особено не херојот Зекановиќ. Буљ има срце, но нема ни тој, бидејќи има и мозок – изјави Милановиќ.
