Уништувањето на шумите во бразилската Амазонија се искачи на рекордно ниво за месец април, бидејќи површината на обесшумените шуми речиси двојно се зголеми во споредба со истиот месец минатата година, покажаа прелиминарните владини податоци објавени вчера.
Во првите 29 дена од април, уништувањето на шумите во регионот изнесувало 1.012,5 квадратни километри, според националната вселенска агенција Инпе.
Април е трет месечен рекорд оваа година, откако беа забележани нови максимални достигнувања и во јануари и во февруари.
„Причината има име и презиме: Жаир Месијас Болсонаро“
Уништувањето на бразилската Амазонија во првите четири месеци од оваа година достигна и рекордни 1.954 квадратни километри, што е зголемување од 69 отсто во однос на истиот период во 2021 година.
Уништувањето на шумите се зголеми откако десничарскиот претседател Жаир Болсонаро ја презеде функцијата во 2019 година и ја ослабе заштитата на животната средина. Болсонаро тврди дека повеќе земјоделство и рударство во Амазонија ќе ја намалат сиромаштијата во регионот.
„Причината за овој рекорд има име и презиме: Жаир Месијас Болсонаро“, рече Марсио Астрини, шеф на бразилската климатска група за климатска опсерваторија.
Министерство: Се бориме против еколошкиот криминал
Бразилското Министерство за животна средина и правда во заедничката изјава соопшти дека владата вложува големи напори во борбата против еколошките злосторства и дека полицијата и еколошките власти соработуваат во операцијата за борба против уништувањето на шумите во пет амазонски држави.
Иако уништувањето на шумите е веќе во пораст, Климатската опсерваторија соопшти дека нејзините аналитичари биле запрепастени од толку високите мерења во април, дел од сезоната на дождови кога дрвокрадците потешко пристапуваат до калливата шума.
Зачувувањето на Амазон е клучно за запирање на катастрофалните климатски промени поради огромното количество јаглерод диоксид што го апсорбираат дождовните шуми.
