Министерството за надворешни работи под водство на министерот Никола Димитров тоне во хаос и самоволие предизвикувајќи срам за државата во и надвор од нејзините граници, рече портпаролот на ВМРО-ДПМНЕ, Наум Стоилковски, во изјава дадена пред зградата на МНР.
„Македонија повторно остана без почеток на преговори, а одговорен за оваа срамна состојба е и министерот за надворешни работи, Никола Димитров, човекот што лани со премиерот и со двајцата вицепремиери се сликаше со палецот нагоре лажејќи дека Македонија добила датум за почеток на преговорите за членство во ЕУ“, посочи партискиот портпарол.
Тој додаде дека само со Никола Димитров како дел од кланот на власт Македонија испраќа 10 амбасадори со скриени биографии и тези.
„Димитров мора да одговори зошто биографиите и тезите со кои 10 дипломати од кариера заминаа во странство и веќе ја претставуваат Република Македонија пред меѓународната заедница останаа тајна. Никогаш досега амбасадорските тези на собраниска комисија не биле целосно класифицирани како доверливи. Станува збор за тези на амбасадори што заминаа во Германија, Унгарија, Шпанија, Украина, Шведска, Австрија, Обединетите Арапски Емирати, Словенија и во Босна и Херцеговина. Притоа беше изземен и претседателот на собраниската комисија, Антонијо Милошоски“, нагласи Стоилкоски.
Според него, шефот на дипломатијата треба да објасни и дали и зошто при враќањето на амбасадорите назад во Македонија ги уназадува со звањата, дури и на најниско ниво, како началник на одделение.
„Македонија изостана од европската агенда за проширување и одговорност мора да има, а најголема одговорност има македонската дипломатијата под министерот Никола Димитров.
Време е Димитров повторно да си ја испрати напишаната оставка што ја повлече лани“, порача портпаролот на опозициската партија.
