Вчера во Виена беше убиен Владимир Рогановиќ, член на озлогласениот Кавачки клан од Котор, Црна Гора. Со него беше Стефан Вилотијевиќ, син на црногорскиот мафијашки шеф и братучед на турбо-фолк пејачката Дара Бубамара. Тој е сериозно повреден. Рогановиќ лани бил осуден во Белград на осум месеци затвор поради фалсификување документи. Откако ја отслужил казната бил префрлен во затвор во Подгорица, а бил ослободен пред две недели, поточно на 7 декември. Пред три дена тој избегал од Црна Гора, потврдиле извори од црногорската полиција за „Вијести“.
Рогановиќ и Вилотијевиќ излегувале од познат виенски ресторан кога било пукано кон нив. И двајцата беа ранети во главата. Рогановиќ имал 31 година и статус на црногорски Корлеоне.
Што е всушност Кавачки клан?
Кавачки клан е име за организирана криминална група од Кавача, мало село во близина на Котор во Црна Гора.
Водач на кланот е Слободан Кашќелан (56), кој беше уапсен минатата година во Прага откако по него Интерпол распиша меѓународна потерница за обиди за убиство, формирање на криминална организација и лихварство.
Врз Кашќелан и неговиот телохранител во Нови Сад во 2014 година бил извршен атентат, кога од мотор било пукано во нив додека биле во автомобил. Двајцата преживеале.
Рогановиќ и неговиот брат Душко станаа познати во јавноста во 2009 година поради нивната вмешаност во убиството на водачот на навивачката група „Делии“ Марко П. Весниќ.
Според обвинението, на 24 јули 2009 година браќата Рогановиќ и Дражен Чаѓеновиќ го убиле Весниќ и го раниле Иван Марковиќ во близина на Младинскиот парк во Игало.
За убиството, братот на Рогановиќ беше осуден на 12 години затвор, додека Владимир беше ослободен од обвиненијата.
Владимир Рогановиќ
Рогановиќ во Црна Гора беше осомничен за лажна дојава за бомба во дискотека, а во Србија минатиот мај тој беше осуден на осум месеци затвор за фалсификување документи. Додека бил во притвор, полицијата се сомнева дека нарачувал бомбашки напади пред куќата на браќата Миливоје и Миленко Иваничевиќ.
На членови на Кавачкиот клан им се суди за злосторничко здружување. Во Котор, покрај него, постои и друга мафијашка група наречена Шкаљари кои доаѓаат од истоименото место.
Кавачки клан и Шкаљари некогаш биле еден мафијашки клан, но по исчезнувањето на 200 килограми кокаин во Валенсија пред две години, меѓу нив започна крвава војна.
Како што пишуваа некои српски медиуми, судирот настанал откако еден од членовите на тогашниот заеднички клан го земал кокаинот како наплата бидејќи додека бил во затвор не се грижеле за него.
Пред две години, во нивните меѓусебни пресметки за само еден месец биле ликвидирани осум лица, а од декември минатата година тој број се зголемил на 24.
„Ако тие не се испоубијат едни со други, а се на добар пат кон тоа, тешко дека може да им се застане на опашката. За нив работат сите, а тие само за себе бидејќи тие се премногу богати“, рекол во интервју извор од врвот на српските безбедносни служби за „Србија денес“.
